Simula bukas, Mayo 12 midterm elections ang magiging pangunahing focus ng Comelec, dahil magsisimula na ang pagpapadala ng mga official ballots. Ayon kay Comelec Chairman George Garcia, ang mga balota ay ipadadala direkta sa mga opisina ng city o municipal treasurers.
Ang unang ipapadala ay ang mga balota para sa Bangsamoro Autonomous Region in Muslim Mindanao, Caraga, Zamboanga Peninsula, at Batanes. Ayon kay Garcia, malapit nang matapos ang manual at machine verification process ng mga balota, kaya’t handa na silang simulan ang pagpapadala. 95% na ng 68,542,564 balota ang na-verify na.
Target ng Comelec na matapos ang buong deployment ng mga balota bago matapos ang buwan ng Abril, bago magsimula ang Final Testing and Sealing (FTS) mula Mayo 2-10. Pagkatapos ng FTS, siselyuhan na ang mga voting machines at ito ay bubuksan lamang sa mismong araw ng eleksyon.
Illegal Campaigning Ayon sa Comelec, apat na kandidato ang iniimbestigahan dahil sa illegal campaigning sa panahon ng Holy Week. Kabilang dito ang isang party-list group at tatlong lokal at pambansang kandidato. May mga ulat din ng vote buying na kinasasangkutan ng isang lokal na kandidato sa Quezon City, na diumano’y nagbigay ng ATM cards.
Ang mga violation tulad ng vote buying ay itinuturing na election offenses na maaaring magdulot ng permanent disqualification sa mga kandidato at karampatang parusa. Pinipilit ng Comelec na tiyakin ang malinis na halalan at hindi ipoproklama ang mga kandidato na may kasong election offenses, kahit pa manalo sila sa eleksyon.