Pasabog ang bagong karakter nina Beauty Gonzalez at Denise Laurel sa “Prinsesa ng City Jail” na inaabangan tuwing 3:20 p.m. sa GMA Afternoon Prime.
Si Beauty bilang Sharlene at si Denise bilang Divina ay parehong nagpapamalas ng kanilang galing bilang mga buntis na nakakulong—si Sharlene ay mapagpatawad, habang si Divina ay mapaghiganti. Handa na ang kanilang tunggalian na mag-init pa habang “nagsisimula” ulit ang kanilang mga buhay.
“Ang ganda ng storya,” sabi ni Beauty, isa sa mga rason kung bakit agad siyang sumang-ayon sa proyekto na idinidirek ni Jerry Lopez Sineneng. “Lahat ng karakter dito ay may purpose. Hindi lang ito tungkol kay Princess, o kay Sharlene, o kay Divina. Gusto kong maging bahagi ng kwento na ito.”
Ang karakter na si Princess, na inampon at pinalaki ng isang jail guard, ay ginagampanan ni Sofia Pablo.
Para kay Denise, ang bigating pangalan ng direktor at cast ang nagpa-“yes” agad sa kanya. “Thrilled ako sa project. Matagal akong nawala sa TV, at nakaka-touch na napili nila ako para gampanan ang kakaibang karakter na si Divina. Sobrang honored ako.”
Masaya rin si Beauty sa tuloy-tuloy na tiwala ng GMA sa kanya simula noong lumipat siya noong 2021. “Iba-iba talaga yung mga projects na binibigay nila sa akin, kaya natututo akong lalo bilang artista.”
Ang show na ito ay nagbigay din ng pagkakataon kay Beauty na makatrabaho ang bagong henerasyon ng mga artista tulad nina Allen Ansay at Sofia Pablo. “Masaya akong makilala sila. Hindi pa kami masyadong nagkakaeksena, pero excited akong mas makabonding sila sa mga susunod na taping.”
Samantala, para kay Denise, ang pagbabalik sa GMA matapos ang dalawang dekada ay nagbibigay ng bagong sigla. “Ngayon, ang focus ay nasa art at collaboration. Ang saya magtrabaho sa ganitong environment.”
Patuloy ang mainit na suporta para sa “Prinsesa ng City Jail” habang inaabangan kung paano bibigyang-buhay nina Beauty at Denise ang kwento ng pakikibaka at tagumpay nina Sharlene at Divina.