Tiniyak ng Bureau of Animal Industry (BAI) na ligtas kainin ang lechon mula sa mga accredited na tindahan sa Quezon City, matapos ipasara ang 14 na lechon shops sa La Loma dahil sa kaso ng African swine fever (ASF).
Ayon sa BAI, mahalagang bumili lamang ng baboy at pork products mula sa lehitimo at accredited na establisimyento at sundin ang tamang food safety practices upang maiwasan ang pagkalat ng sakit.
Pinayuhan din ng ahensya ang mga LGU, hog raisers, traders, slaughterhouses at retailers na:
- Magpatupad ng mahigpit na biosecurity measures,
- Ipagbawal ang swill feeding o pagpapakain ng tira-tirang pagkain na may pork,
- Regular na i-disinfect ang mga sasakyan at kagamitan,
- At agad i-report ang di-karaniwang pagkamatay ng baboy.
Kamakailan, inatasan ng Department of Agriculture (DA) ang mga attached agencies nito — kabilang ang BAI, Agribusiness and Marketing Assistance Service at National Meat Inspection Service — na paigtingin ang inspection sa mga pasilidad at beripikasyon ng storage at labeling compliance.
Nagpatupad din ang DA ng ASF regionalization scheme, kung saan kinikilala ang ASF-free zones ng mga bansang nag-e-export ng pork products, batay sa standards ng World Organization for Animal Health.
Sa ilalim ng bagong patakaran, tanging DA-accredited countries lamang ang maaaring mag-apply para sa ASF regionalization, at kinakailangang magsumite ng detalyadong ulat sa kanilang ASF surveillance, control measures at malinaw na boundary ng disease-free areas.
Sa kabila ng mga pagsasara, iginiit ng BAI na nananatiling ASF-free ang lechon mula sa mga aprubadong tindahan sa Quezon City.