Bahagyang lumakas ang Bagyong Aghon (international name: Ewiniar) noong Lunes ng umaga habang papalayo ito mula sa bansa sa ibabaw ng Philippine Sea.
Batay sa pinakabagong advisory ng Philippine Atmospheric, Geophysical, and Astronomical Services Administration (Pagasa), huling namataan si Aghon 105 kilometro silangan ng Baler, Aurora.
Kasalukuyan itong kumikilos pahilagang hilagang-silangan sa bilis na 10 kilometro kada oras (kph), taglay ang pinakamalakas na hanging 140 kph at pagbugsong aabot sa 170 kph.
“Mananatili po itong typhoon category hanggang paglabas ng Philippine area of responsibility (PAR),” ayon kay Pagasa weather specialist Rhea Torres.
Inaasaahang lalabas ng PAR si Aghon pagsapit ng Miyerkules ng gabi.
Dahil sa epekto ni Aghon, inaasahang magkakaroon ng 50 hanggang 100 milimetro ng malakas na pag-ulan sa silangang bahagi ng Isabela at hilagang bahagi ng Aurora.
Binalaan ni Torres na ang mga pag-ulan na ito ay maaaring magdulot ng pagbaha, landslides, at pag-apaw ng mga ilog lalo na sa mga lugar na madaling tamaan ng ganitong mga panganib.
Samantala, nakataas din ang gale warning sa mga baybayin ng Isabela, Cagayan, Aurora, at Quezon kabilang ang Polillo Islands — kung saan inaasahang aabot sa 2.8 hanggang 4.5 metro ang taas ng alon.