Patuloy ang paglala ng aktibidad ng Bulkang Mayon matapos mabuo ang isang bagong madilim na lava dome nitong Huwebes ng umaga, Enero 8, kasabay ng pagbuga ng lava at pyroclastic density currents (PDCs), ayon sa Phivolcs.
Bandang 11:40 a.m., nagsimulang bumaba ang mga PDC sa Miisi Gully at sa timog na bahagi ng bulkan, habang tuluy-tuloy ang pag-usok mula sa bunganga. Umabot na sa 49 PDCs ang naitala na dumaan sa Miisi, Bonga at Basud gullies. Mas maaga ring naiulat na isang dome-collapse PDC ang nagbuga ng abo na umabot sa 1,000 metro ang taas, na nakaapekto sa ilang lugar sa Albay kabilang ang Legazpi at Ligao.
Sa loob lamang ng 24 oras noong Enero 7, nakapagtala ang Mayon ng 162 rockfalls, 50 PDCs, isang lindol ng bulkan, at 702 tonelada ng sulfur dioxide emissions kada araw—palatandaan ng tumitinding unrest.
Dahil dito, itinaas na sa Alert Level 3 ang Mayon noong Enero 6, hudyat ng mas mataas na posibilidad ng mapanganib na pagsabog. Patuloy ang sapilitang paglikas ng mga residente sa loob ng 6-kilometrong permanent danger zone, habang nakaalerto ang mga awtoridad sakaling itaas pa sa Alert Level 4.
Nagbabala ang Phivolcs sa mga posibleng panganib gaya ng lava flows, rockfalls, pagsabog, at lahar lalo na kung may malakas at tuloy-tuloy na ulan. Ayon sa pulisya ng Albay, mahigit 500 personnel ang naka-deploy, habang 3,516 katao mula sa 13 barangay ang kasalukuyang nasa evacuation centers at may mga lugar na sinuspinde ang klase bilang pag-iingat.