Patuloy sa kanyang layuning maglingkod nang direkta sa mga mamamayan ng Malabon, inilunsad ni Mayor Jeannie Sandoval ang Mobile Jeannie Services—isang makabagong programa na nagdadala ng mga pangunahing serbisyo ng pamahalaan direkta sa mga barangay. Sa darating na Oktubre 23, 2025, ganap na alas-nuebe ng umaga, tutungo ang Mobile Jeannie Services sa Barangay Tugatog upang maghatid ng kaginhawahan at tulong sa mga residente.
Kabilang sa mga serbisyong ihahatid ay ang “Linis Kalye” sa Mercuro Street na layuning mapanatili ang kalinisan ng kapaligiran; “Libreng Laba” at “Libreng Ligo” sa Acero Street na nagbibigay ng libreng paggamit ng washing machine at mobile shower; at ang “Plastic na Basura, May Kita Ka!”—isang programang pangkalikasan kung saan maaaring ipagpalit ng mga residente ang plastik na basura kapalit ng salapi.
Binigyang-diin ni Mayor Sandoval na ang Mobile Jeannie Services ay sumasalamin sa malasakit, pagiging abot-kamay ng serbisyo, at tunay na dedikasyon sa publiko. Sa pamamagitan ng proyektong ito, nais ng pamahalaang lungsod na palakasin ang pakikilahok ng komunidad, itaguyod ang kalinisan, at gawing mas magaan ang pang-araw-araw na pamumuhay ng bawat Malabueño.