Umusad paakyat sa knockout stages ang World No. 6 Argentina matapos nitong pataubin ang No. 14 Poland, 3-2, sa isa sa pinaka-inaabangang laban sa FIFA Futsal Women’s World Cup Philippines 2025 na ginanap kagabi sa PhilSports Arena.
Maagang nagpakitang-gilas ang Argentina, agad bumuo ng 3-0 lead sa loob lamang ng 15 minuto sa pamamagitan ng matitinding tira nina Silvina Nava, Agostina Chiesa, at Lucia Rossi. Halos mukhang madali nilang tatapusin ang laban.
Pero hindi basta bumigay ang Poland. Sa ikalawang half, bumalik sila nang mas agresibo—unang nakapuntos si Aga Bala sa 22nd minute, at sinundan ito ng dramatic goal mula sa goalkeeper na si Anna Choras sa 39th minute, na naglapit ng score sa 3-2.
Sa huling segundo, todo atake ang Poland, pero nanindigan ang depensa ng Argentina para makumpleto ang panalo—ang kanilang pangalawang sunod matapos ang 6-0 blowout kontra Morocco sa opening match.
Umakyat sa six points ang Argentina at nanatiling nasa tuktok ng Group A, habang ang Poland ay nanatili sa tatlong puntos, galing sa kanilang dominanteng 6-0 panalo laban sa host Philippines.
Samantala, ang Filipina5 ay nakapokus kagabi sa paghahanap ng panalo kontra Morocco upang makahabol sa Poland at makasungkit ng mahalagang puntos.
Ang top two teams sa bawat grupo ang uusad sa quarterfinals—kaya bawat laban, bigat na bigat ang stakes.