Arestado ng mga awtoridad ng China ang tatlong Pilipino na sinasabing sangkot sa espionage o espiya sa bansa, na kilala sa malawakang pagmamanman ng mga mamamayan at mga bisita nito. Ayon sa ulat ng Chinese state media na Global Times, inaalam ng mga awtoridad ng China ang isang kaso ng Filipino espionage.
Ang mga pag-aresto ay naganap dalawang araw matapos maglabas ng travel advisory ang Chinese embassy sa Manila, na nagbabala tungkol sa madalas na “pang-aabuso” ng mga ahensya ng Pilipinas laban sa mga Chinese nationals.
Ayon sa imbestigasyon, matagal nang nakatutok ang mga intelligence agencies ng Pilipinas sa pagkuha ng impormasyon tungkol sa military deployments ng China. Isang Filipino na naninirahan sa China, na madalas bumisita sa mga lugar malapit sa military facilities, ay iniuugnay sa isang “Philippine handler” na tumutulong sa espionage at intelligence-gathering activities sa China.
Ito ay kasunod ng mga pagkaka-aresto sa Pilipinas ng anim na Chinese nationals at dalawang kasabwat, na sinasabing nagsasagawa ng espionage sa mga galaw ng mga US at Philippine Navy ships sa Subic Bay. Ayon sa National Bureau of Investigation (NBI), ang mga Chinese suspects ay nagpapanggap bilang mga mangingisda at turista.
Samantala, kilala ang China sa kanilang mass surveillance system, kung saan ginagamit nila ang mga internet at camera surveillance, pati na rin ang ibang digital na teknolohiya para mamonitor ang kanilang mamamayan at mga bisita, na lalong pinaigting sa ilalim ng administrasyon ni Pangulong Xi Jinping.