Nagpaabot ng taos-pusong pagpupugay ang dating world heavyweight champion na si Anthony Joshua sa dalawa niyang malalapit na kaibigang nasawi sa isang aksidente sa sasakyan sa Nigeria, na tinawag niyang kanyang mga “kapatid” at “dakilang tao.”
Nasugatan lamang nang bahagya si Joshua sa insidenteng naganap noong Disyembre 29, bago siya makauwi ng England at dumalo sa libing nina Latif Ayodele at Sina Ghami noong nakaraang Linggo. Sa isang Instagram post, nagpasalamat siya sa mga nagpakita ng pagmamahal at suporta para sa kanyang mga kaibigan.
Ayon kay Joshua, hindi niya agad napagtanto kung gaano kaspesyal ang mga ito habang magkasama silang nagbibiro at naglalakad, at aniya’y tila ipinagkatiwala siya ng Diyos sa piling ng mabubuting tao. Inamin din niyang masakit ang nangyari, ngunit mas ramdam niya ang bigat ng pinagdaraanan ng mga magulang ng mga biktima.
Si Ayodele ay personal trainer ni Joshua, habang si Ghami naman ang matagal na niyang strength and conditioning coach. Pareho silang nasawi sa lugar ng aksidente matapos bumangga ang sinasakyan nilang Lexus SUV sa isang nakahintong trak sa isang abalang highway na nagdurugtong sa Lagos at Ibadan.
Kinasuhan na ng pulisya ang driver ng sasakyan na si Adeniyi Mobolaji Kayode, 46, dahil sa dangerous driving causing death. Si Joshua, na may dugong Nigerian, ay nasa bakasyon sa bansa matapos ang kanyang panalo laban kay Jake Paul sa Miami noong Disyembre 19.