Nagbukas ng loob si Angelica Panganiban tungkol sa madilim na bahagi ng showbiz—ang mga artistang nauuwi sa alak at droga dahil sa matinding presyon at pagod sa trabaho.
Sa panayam niya sa Spotify podcast ni Alyssa Valdez, inamin ng aktres na madalas hindi nauunawaan ng publiko ang hirap na pinagdadaanan ng mga artista.
“Akala nila wild lang o pariwara ang mga artista, pero hindi nila alam kung gaano kabigat ‘yung emosyon na kailangang harapin sa bawat eksena,” ani Angelica.
Ikinuwento niya na minsan, sa isang araw ng taping, kailangan niyang magluksa sa isang eksena, magdiwang ng kaarawan sa susunod, tapos makaranas naman ng mabigat na trauma sa isa pa.
“Uuwi kang basag ang isip, hindi ka makatulog. Kaya ‘yung iba, tumatakbo sa alak o droga para makalimot kahit sandali,” dagdag niya.
Ayon kay Angelica, ang ganitong pagtakbo ay nagiging “blackhole” — mahirap nang makawala kapag nasimulan. Gayunman, may mga artista raw na natutunang “mag-disconnect” sa kanilang mga role para mapangalagaan ang sarili.
Binalikan din ni Angelica ang kanyang mental breakdown noong 2009, nang sabay-sabay ang kanyang mga proyekto tulad ng Rubi, I Love You, Goodbye, Banana Sunday, Kris TV, at ASAP.
“Iyak ako nang iyak, sabi ko, hindi ko na kilala ‘yung sarili ko. Ang dami kong ginagampanang role, pero si Angelica, nawala na,” emosyonal niyang pag-amin.
Sa huli, sinabi ng aktres na natagpuan niya ang tunay na kaligayahan hindi sa kasikatan, kundi sa pagiging ina kay Amile at asawa ni Gregg Homan.
“Akala ko dati acting ang pangarap ko, pero ngayon, pamilya ko na talaga ang gusto kong buuin,” pagtatapos niya.