Muling pinatunayan ni Rubilen Amit kung bakit ang Pilipinas ang itinuturing na billiards epicenter ng mundo.
Sa inspirasyon ng kanyang idolong si Efren “Bata” Reyes, dinaig ni Amit ang dating kampeon na si Chen Siming ng China, 3-1 (1-4, 4-2, 4-2, 4-3), para masungkit ang WPA World 9-Ball Women’s Championship sa Hamilton, New Zealand.
Ilang buwan matapos ang pagkapanalo ni Carlo Biado sa World 10-Ball tilt sa Las Vegas, muling nagtagumpay ang Pilipinas sa larangan ng billiards sa tulong ni Amit.
Kasama na ngayon si Amit sa hanay ng mga Filipino billiards legends tulad ni Reyes, na naghubog sa kanyang laro. Matapos ang matagal na paghihintay at ang masakit na pagkatalo sa 2007, tuluyang nakuha ni Amit ang matamis na tagumpay.
Bagama’t muntik na siyang matalo, isang pagkakamali ni Chen ang nagbigay kay Amit ng pagkakataon na tapusin ang laban at kunin ang titulo.