Hindi nagpahuli si Alex Eala sa laban kontra Italyang si Lucia Bronzetti, kung saan winasak niya ito ng 6-0, 6-1 para makapasok sa ikalawang round ng Lexus Eastbourne Open sa England.
Isang araw lang matapos ang matinding tatlong-set na laban laban kay American Hailey Baptiste sa qualifiers, ipinakita ni Eala ang kanyang husay sa serves at returns para matapos ang laban sa loob ng isang oras at isang minuto lamang.
Susunod niyang haharapin ang mananalo sa pagitan ni Sonay Kartal ng Great Britain o si third seed Jelena Ostapenko ng Latvia sa Round of 16 ng WTA 250 pre-Wimbledon grass tournament.
Samantala, ipinakita naman ni Carlos Alcaraz na siya pa rin ang mananakop sa Wimbledon matapos talunin si Jiri Lehecka sa final ng Queen’s Club sa isang matinding laban, 7-5, 6-7 (5), 6-2. Ito na ang kanyang ika-18 sunod na panalo!
Sa Halle, nilupig ni Alexander Bublik ang top player na si Daniil Medvedev sa 6-3, 7-6 (7/4) para makuha ang kanyang ikalawang grass court title.
Hindi rin nagpahuli si dating Wimbledon champ Marketa Vondrousova na nilupig si Wang Xinyu para manalo sa Berlin Open, unti-unting bumangon mula sa injury hiatus.