Kahit na maagang nabigo sa Australian Open qualifiers, patuloy pa rin ang pag-angat ng Filipina tennis sensation na si Alex Eala sa Women’s Tennis Association (WTA) rankings!
Mula sa No. 147, tumalon siya ng siyam na puwesto at ngayon ay nasa No. 138—ang pinakamataas na ranggo niya sa kanyang karera sa edad na 19.
Naabot niya ang dating career-high na No. 143 noong nakaraang taon matapos magwagi ng twin titles sa singles at doubles events ng W100 Vitoria-Gasteiz tournament sa Spain.
Sa kabila ng kanyang 7-5, 6-2 pagkatalo laban sa beteranang Croatian na si Jana Fett sa Round 1 ng Australian Open qualifiers, malinaw na tuloy-tuloy ang pag-akyat ni Eala sa hanay ng pinakamahusay sa mundo.