Muling nagpakita ng bagsik ang pambato ng Pilipinas sa tennis na si Alex Eala matapos niyang baligtarin ang laban at talunin si Alina Charaeva ng Russia upang masungkit ang upuan sa quarterfinal round ng Birmingham Open. Dominante ang simula ng 21-anyos na Filipina nang mabilis niyang makuha ang unang set sa iskor na 6-2. Ngunit naging kapana-panabik ang pagpapatuloy ng laro nang biglang humabol si Charaeva sa ikalawang set at itala ang malaking bentahe na 2-5 pabor sa Russian player.
Sa halip na panghinaan ng loob, unti-unting gumapang pabalik sa laro ang top-seeded na si Eala sa pamamagitan ng sunod-sunod na pagkapanalo sa mga sumunod na game. Sa loob ng kabuuang isang oras at 40 minuto, matagumpay niyang naisara ang ikalawang set sa iskor na 7-5 para tuluyang tapusin ang laban. Nagtala ang tennis star ng tatlong ace at nakalikom ng mas maraming service at receiving points kumpara sa kaniyang katunggali na naging susi sa kaniyang pagwawagi.
Dahil sa pambihirang comeback na ito, opisyal nang pumasok si Eala sa Final Eight ng torneo. Susunod niyang makakaharap sa quarterfinals ang pambato ng Thailand na si Mananchaya Sawangkaew para sa isang kapana-panabik na tapatan ng mga manlalaro mula sa South East Asia.