Matapos ang ilang maagang pag-exit sa mga nakaraang torneo, muling bumangon si Alex Eala nang makapasok siya sa ikalawang round ng Prudential Hong Kong Open nitong Martes ng gabi.
Ang 20-anyos na Filipina tennis star ay lamang sa iskor na 6-4, 2-1 laban kay Katie Boulter ng Great Britain nang mapilitang magretiro ang huli dahil sa injury sa kaliwang binti. Si Boulter ay runner-up pa naman sa nakaraang edisyon ng torneo.
Susunod na makakaharap ni Eala sa Round of 16 si Victoria Mboko ng Canada, na kasalukuyang ika-21 sa mundo at ikatlong seed ng kompetisyon. Determinado si Eala na samantalahin ang pagkakataon matapos ang sunod-sunod na first-round losses sa Guangzhou, Osaka, at Wuhan.
“Masaya ako na umabante ako sa susunod na round, kahit hindi ito ang paraan na gusto kong matapos ang laban,” ani Eala, na umaasang nasa maayos na kondisyon si Boulter.
Si Eala ay pumasok sa WTA 250 Hong Kong Open dala ang pinakamataas na ranking sa kanyang karera — No. 51 sa mundo.