Patuloy ang magandang takbo ng PLDT High Speed Hitters matapos nilang talunin ang Galeries Tower Highrisers sa straight sets, 25-18, 25-22, 25-17, sa Premier Volleyball League All-Filipino Conference na ginanap sa Filoil EcoOil Centre.

Pinangunahan ni Savi Davison ang opensa ng PLDT matapos magtala ng 21 puntos, kabilang ang 18 kills. Malaki rin ang naging ambag ni Kim Fajardo na naghatid ng 15 excellent sets upang mapanatili ang kanilang malakas na atake.

Dahil sa panalo, naitala ng High Speed Hitters ang kanilang ikaanim na tagumpay sa pitong laro at nasolo ang liderato sa torneo. Isang panalo na lamang ang kailangan ng koponan upang makapasok sa crossover qualifying round kung saan ang dalawang mananalo ay direktang aabante sa semifinals.

Gayunman, ayon kay PLDT coach na si Rald Ricafort, mas pinipili ng koponan na magpokus sa bawat laro sa halip na isipin agad ang semifinals. Nakatakda pa nilang harapin ang Choco Mucho Flying Titans at Nxled Chameleons sa mga susunod na laban.

Samantala, bumagsak naman sa 2-5 na rekord ang Galeries Tower sa kumperensya.

Nananatiling buhay ang tsansa ng Philippine women’s football team o Filipinas na makapasok sa quarterfinals ng AFC Women’s Asian Cup sa Australia matapos talunin ang Iran, 2-0, sa huling laro nila sa Group A.

Naitala ang dalawang goal ng koponan mula kina Sara Eggesvik at Chandler McDaniel, na nagbigay sa Filipinas ng ikatlong puwesto sa kanilang grupo. Sa kasalukuyan, may tatlong puntos at goal difference na -2 ang Pilipinas, ikalawa sa labanan para sa dalawang puwesto ng best third-placed teams.

Nangunguna sa side race ang Vietnam na may tatlong puntos at goal difference na zero, habang nasa ikatlo ang Uzbekistan na wala pang puntos at may -6 goal difference.

Upang makapasok sa quarterfinals, kailangan matalo ang Vietnam ng Japan nang hindi bababa sa tatlong goal, o kaya naman ay magtabla ang Uzbekistan at Bangladesh o manalo ang alinman sa kanila nang hindi lalampas sa apat na goal.

Ayon kay Filipinas head coach Mark Torcaso, marami pang pagkakataon ang koponan sa unang half laban sa Iran ngunit umaasa silang sapat na ang kanilang dalawang goal upang makausad sa susunod na round.

Ang apat na koponang mananalo sa quarterfinals ay awtomatikong makakakuha ng puwesto sa 2027 FIFA Women’s World Cup, habang ang mga matatalo ay magkakaroon pa ng pagkakataon sa play-in matches para sa natitirang dalawang slot.

Isa na namang malaking tagumpay ang naitala ni Filipina tennis star Alex Eala matapos talunin ang world No. 4 na si Coco Gauff ng Estados Unidos sa third round ng 2026 Indian Wells Open sa California.

Nanalo si Eala sa iskor na 6-2, 2-0 matapos mag-retire si Gauff sa second set dahil sa pananakit ng kaliwang braso. Bago ito, kontrolado na ni Eala ang laro at madaling nakuha ang unang set.

Sa harap ng halos 16,000 manonood sa Indian Wells Tennis Garden, nakapasok si Eala sa Last 16 ng prestihiyosong WTA 1000 tournament. Dahil dito, inaasahan ding aangat pa ang kanyang ranking at posibleng makapasok sa Top 30 sa mundo.

Ayon kay Eala, bagama’t hindi niya gustong manalo sa ganitong paraan, malaking karangalan pa rin para sa kanya ang makalaro sa malaking entablado laban sa isang top player tulad ni Gauff.

Ito na ang ikatlong panalo ni Eala laban sa Top 5 players, matapos niyang talunin sina Iga Swiatek at Madison Keys noong Miami Open noong nakaraang taon. Mayroon na rin siyang panalo laban sa world No. 8 na si Jasmine Paolini sa Dubai.