Isang matinding marathon match ang dinaanan ni Alex Eala matapos talunin ang Belgian tennis star na si Greet Minnen, 7-6 (7-5), 6-7 (3-7), 7-5, sa Suzhou Open sa China kahapon. Tumagal nang higit tatlong oras ang bakbakan bago masungkit ng 19-anyos na Pinay ang tiket papuntang quarterfinals.
Hindi naging madali para kay Eala ang panalo—mula sa muntikang maubos ang kanyang 3-0 lead sa unang set, hanggang sa kabiguan sa ikalawang set tiebreak, bago tuluyang bumawi sa ikatlong set. Sa dulo, nakalapit siya sa panalo sa ikatlong match point nang mag-error si Minnen sa huling tira.
Malakas ang kalaban: si Minnen ay WTA No. 72, may career earnings na lampas $3 milyon, at nagtala pa ng siyam na aces kontra sa tatlo ni Eala. Gayunpaman, nanaig ang tapang at diskarte ng Pinay na nakapagtala ng kabuuang 127 puntos laban sa 119 ng Belgian.
Dahil dito, nakapasok si Eala sa kanyang ikaapat na sunod na quarterfinals at siguradong may premyong $3,450 (mahigit P200,000). Susunod niyang makakaharap ang Swiss sixth seed na si Viktorija Golubic, dating WTA No. 35 at kasalukuyang No. 90, na mabilis namang winalis ang Czech player na si Linda Fruhvirtova.