Ipinamalas ni Alex Eala ang tibay ng loob matapos makabangon mula sa unang set na kabiguan para talunin si Donna Vekic ng Croatia, isang Paris Olympics silver medalist, sa Round 1 ng 2026 ASB Classic sa Auckland, New Zealand.
Matapos sayangin ang maagang 3-0 abante at matalo sa unang set, muling bumawi ang WTA No. 53 na si Eala at isinara ang laban sa iskor na 4-6, 6-4, 6-4 sa loob ng halos tatlong oras. Ito ang kanyang unang panalo sa singles ngayong season.
Pinatunayan ng 20-anyos na Pinay tennis ace ang kanyang composure laban sa mas beteranong si Vekic, na may apat na WTA titles at dating world No. 17. Malaki rin ang naging tulong ng momentum mula sa kanyang panalo sa doubles kamakailan.
Susunod na makakalaban ni Eala sa Round of 16 ang isa pang Croatian na si Petra Marcinko. Nagpasalamat naman si Eala sa suportang natanggap, sabay sabing inspirasyon sa kanya ang mga taong patuloy na sumusuporta—kahit malayo sa tahanan.