AirAsia Move, nilinaw na ‘di sila nagpapalit-palit ng presyo ng pamasahe, bagkus may teknikal na isyu sa sistema ng flight pricing partners. Ito ang sagot nila sa cease and desist order ng Civil Aeronautics Board (CAB) na nagsabing lumalabag sila sa itinakdang fare structure.
Ayon kay AirAsia Move CEO Nadia Omer, hindi sila direktang nagse-set ng fare; ang problema raw ay sanhi ng “temporary data synchronization issues” mula sa third-party pricing providers. Sinabi rin nila na hindi lang sila ang naapektuhan—mga booking platforms gaya ng Agoda, Kiwi, at Traveloka ay naranasan din ito.
Iginiit ng AirAsia Move na ang regulasyon ng CAB ay para lang sa air carriers at hindi sa mga foreign-based platforms tulad nila. Anila, mabilis nilang nilapatan ng solusyon ang isyu at patuloy silang nakikipagtulungan sa gobyerno para mapanatili ang patas na presyo at proteksyon ng mga pasahero.
Ngunit malaking isyu pa rin ang mataas na presyo ng tickets nila papuntang Tacloban, lalo na’t nagkakaroon ng krisis sa transportasyon sa Eastern Visayas dahil sa rehabilitation ng San Juanico Bridge. Naitala na ang kanilang one-way ticket mula Manila papuntang Tacloban na umabot sa halos P39,000—mahigit tatlong beses na mas mahal kaysa ibang airline tulad ng Philippine Airlines na nag-aalok ng humigit-kumulang P12,000.
Dahil dito, plano ng Department of Transportation na kasuhan ang AirAsia Move ng economic sabotage at pinatawag na ang mga opisyal nila para sa imbestigasyon.
Samantala, ipinagtanggol ng CAB ang kanilang cease and desist order, sinabing may kapangyarihan silang kontrolin ang mga kumpanyang lumalabag sa itinakdang fare cap at posibleng may price gouging na nagaganap sa gitna ng krisis.
Patuloy ang gulo sa pagitan ng AirAsia Move at gobyerno habang hinahanap ang pinakamainam na solusyon para sa mga pasahero.