Gumawa ng kasaysayan sa 97th Academy Awards si Adrien Brody matapos itala ang pinakamahabang acceptance speech sa Oscars nang tanggapin niya ang Best Actor award.
Ang aktor ay kinilala para sa kanyang pagganap sa “The Brutalist,” ang kanyang pangalawang panalo mula sa dalawang nominasyon, matapos ang kanyang iconic na tagumpay noong 2003 para sa “The Pianist.”
Sa 5 minuto at 40 segundo, kinumpirma ng Guinness World Records na ang speech ni Brody ang pinakamahaba sa kasaysayan ng Oscars, tinalo ang dating record ni Greer Garson noong 1942 (5 minuto at 30 segundo) nang siya ay nagwagi bilang Best Actress para sa “Mrs. Miniver.”
Maalamat Bago pa Sumalang
Bago pa man umakyat sa entablado, naging viral na ang moment ni Brody matapos niyang ipasa ang kanyang chewing gum sa partner niyang si Georgina Chapman bago tanggapin ang tropeo mula kay Cillian Murphy, ang kanyang “Peaky Blinders” co-star at nakaraang Best Actor winner.
Matapos magpasalamat sa Diyos at sa kanyang mga kasamahan sa industriya, ginamit ni Brody ang unang bahagi ng kanyang speech upang balikan ang kanyang career at kung gaano kahaba ang kanyang naging paglalakbay pabalik sa Oscars stage.
“Higit pa sa tugatog ng karera, ito ay pagkakataong magsimula muli. Umaasa akong sa susunod na 20 taon, mapapatunayan kong karapat-dapat ako sa mga makabuluhan at mahalagang papel,” ani Brody.
Pinapurihan din niya ang kanyang kapwa nominado, ang kanyang representation team, ang distributors ng “The Brutalist,” ang direktor nitong si Brady Corbet, ang kanyang real-life producing partner na si Mona Fastvold, pati na rin ang kanyang co-stars na sina Guy Pearce at Felicity Jones.
Sa emosyonal na bahagi ng speech, nagpasalamat siya kay Chapman at sa mga anak nito—Dashiell at India—mula sa dating asawa nitong si Harvey Weinstein.
Matapos nito, isang spokesperson ni Weinstein ang naglabas ng pahayag na nagsasabing “masaya siya para kay Georgina at nagpapasalamat na ang kanyang mga anak ay minamahal at inaalagaan gaya ng nararapat.”