Patunay na hindi lang sa pag-arte mahusay ang Korean star na si Koo Hye Sun matapos niyang makapagtapos ng master’s degree sa South Korea.
Ibinahagi ng “Boys Over Flowers” actress ang kanyang graduation photos suot ang toga at cap, kasama ang cover ng kanyang thesis. Nakuha ni Koo ang kanyang master’s degree sa engineering mula sa prestihiyosong Korea Advanced Institute of Science and Technology (KAIST).
Pansamantala niyang isinantabi ang pag-aaral noong huling bahagi ng 2010s dahil sa kanyang biglaang pagsikat sa buong mundo matapos ang hit drama noong 2009. Matapos ang kontrobersyal na hiwalayan nila ni Ahn Jae Hyun noong 2019 at ang kanyang paglayo sa spotlight, bumalik si Koo sa akademya noong 2020.
Nagtapos siya ng film at media studies sa Sungkyunkwan University na may pinakamataas na parangal noong 2024, bago ipagpatuloy ang master’s sa KAIST. Ayon sa ulat, nakalikha rin siya ng eco-friendly hair roller na tinawag na Kurool, na ginawaran ng 2025 Excellent Patent Award.
Muling pinatunayan ni Koo Hye Sun na isa siyang tunay na achiever—sa sining man o sa larangan ng agham.