Inilunsad ng Quezon City at Malabon ang kani-kanilang Media and Information Literacy (MIL) roadmaps na layong paigtingin ang kritikal na pag-iisip at responsable komunikasyon sa mga paaralan at komunidad.

Sa Philippine Media and Information Literacy Conference nitong Martes, ipinresenta nina Quezon City Mayor Joy Belmonte at Malabon Mayor Jeannie Sandoval ang kanilang mga proyekto bilang bahagi ng pagiging pilot MIL cities ng UNESCO sa Asia-Pacific region.

Sa Quezon City, maglulunsad ng debate competitions sa mga pampublikong paaralan sa pakikipagtulungan ng The New York Times Company. Ayon kay Belmonte, natuklasan nilang walang debate training sa mga public schools.

“Sayang kung wala nito — gusto nating magkaroon ng debate teams sa lahat ng pampublikong paaralan sa lungsod,” aniya.

Dagdag pa ni Belmonte, target din ng lungsod na magpatayo ng public library sa bawat barangay, dahil 34 lamang sa 142 barangay ang kasalukuyang may silid-aklatan.

Samantala, sa Malabon, plano ni Mayor Sandoval na magbukas ng MIL corner sa lahat ng 21 barangay, upang hikayatin ang mamamayan na maging mas mapanuri at responsable sa paggamit ng impormasyon.

Bilang bahagi ng UNESCO MIL Cities Network, makikipag-ugnayan ang QC at Malabon sa iba pang lungsod upang isulong ang media literacy at labanan ang maling impormasyon sa rehiyon.

Iminungkahi ni dating Manila Mayor Isko Moreno sa Department of Public Works and Highways (DPWH) at Department of Environment and Natural Resources (DENR) na ilipat ang sewage treatment plant (STP) na nasa kahabaan ng Roxas Boulevard.

Ayon kay Moreno, nakasisira sa tanawin ng sikat na Manila Bay sunset ang kasalukuyang pasilidad dahil ito ay nagmumukhang “eyesore” o sagabal sa ganda ng bayfront.

Bilang solusyon, iminungkahi niyang ilipat ang STP sa loob ng Cultural Center of the Philippines (CCP) complex, kung saan maaaring magtayo ng mas malaki at mas modernong pasilidad na hindi sisira sa tanawin.

“Ito ay para mapanatili ang balanse sa pagitan ng kalinisan at kagandahan ng lungsod,” paliwanag ni Moreno sa pulong kasama si Public Works Secretary Vince Dizon at mga kasapi ng Metro Manila Council.

Layunin ng panukala na mapangalagaan ang kapaligiran habang ibinabalik ang dating sigla at atraksyon ng Manila Bay, isa sa mga pangunahing destinasyon ng lungsod para sa mga turista at residente.

Mahigit 40 katao ang nasawi at libo-libo ang inilikas matapos ang malawakang pagbaha na dulot ng Bagyong Tino (Kalmaegi) sa gitnang bahagi ng Pilipinas nitong Martes.

Pinakamalubha ang pinsala sa lalawigan ng Cebu, kung saan 39 na ang kumpirmadong patay, ayon sa provincial information office. Hindi pa kasama rito ang mga nasawi sa Cebu City. Apektado rin ang mga karatig-lalawigan gaya ng Leyte at Bohol, kung saan may naiulat na pagkalunod at pagkamatay dahil sa bumagsak na puno.

Ayon sa mga ulat, lubog sa baha ang buong bayan, at ilang kotse, trak, at shipping containers ay inanod ng rumaragasang tubig. “Hindi namin inaasahan na tubig, hindi hangin, ang magiging panganib,” ayon kay Cebu Gov. Pamela Baricuatro, na tinawag ang sitwasyon bilang “walang kaparis sa kasaysayan ng probinsya.”

Sa loob lamang ng 24 oras bago ang landfall, umabot sa 183 millimeters ng ulan ang bumuhos sa paligid ng Cebu City—mas mataas pa sa karaniwang 131 mm buwanang average.

Samantala, isang helicopter ng Philippine Air Force na tumutulong sa relief operations sa Mindanao ang bumagsak noong Martes ng hapon habang papunta sa Butuan City. Kumpirmadong anim na sakay—dalawang piloto at apat na crew—ang nasawi, ayon sa mga opisyal ng militar.

Kabuuang 400,000 katao ang inilikas bago tumama ang bagyo, kabilang ang mga pamilyang naninirahan pa sa mga tent matapos ang 6.9 magnitude na lindol noong Setyembre.

Ayon sa PAGASA, bumabagal na si Tino habang tinatahak ang Visayas, taglay ang hanging 120 kph at bugso na 165 kph.

Paalala ng mga siyentipiko, mas lumalakas at bumibigat ang ulan ng mga bagyo dahil sa climate change, na dahilan ng mas madalas na delubyo sa mga rehiyon tulad ng Kabisayaan.