Apapat na lokal na kandidato sa Masbate ang nahaharap sa posibleng diskwalipikasyon at kaso ng election offense dahil sa umano’y paggamit ng emergency alert messages sa kanilang kampanya.
Inatasan ng Commission on Elections (Comelec) sina Ricardo Kho, Fernando Talisic, Elisa Kho, at Olga Kho – mga kandidato para sa gobernador, bise gobernador, kongresista, at alkalde – na magbigay ng paliwanag sa loob ng limang araw kung bakit hindi sila dapat kasuhan ng paglabag sa mga alituntunin ng kampanya.
Ayon sa Comelec, nakatanggap ang mga residente ng Masbate City ng emergency alert message noong Abril 3 na naglalaman ng mga political ads para sa mga nabanggit na kandidato sa paparating na midterm elections sa Mayo.
Binanggit ng Comelec sa kanilang show-cause order na ang paggawa at pagpapakalat ng pekeng balita, lalo na sa panahon ng eleksyon, ay itinuturing na maling paggamit ng social media at isang election offense.