Tatlong security personnel ng Office for Transportation Security (OTS) ang sinibak sa puwesto matapos masangkot sa umano’y panibagong kaso ng ‘tanim-bala’ sa Ninoy Aquino International Airport (NAIA).
Ayon kay DOTr Secretary Vince Dizon, agad na tinanggal sa serbisyo ang tatlong empleyado dahil sa paglabag sa airport protocols. Ipinahayag ni Dizon ang kanyang pagkadismaya matapos mag-viral ang video ng OTS personnel na humarang sa isang babaeng pasahero sa boarding gate dahil umano sa natagpuang bala sa kanyang bag.
Ang biktima, si Ruth Adel, 69, ay patungo sa Vietnam kasama ang kanyang pamilya noong Marso 6 nang siya ay pigilan ng OTS kahit nakalampas na siya sa security check. Ibinahagi ni Adel sa social media na ang nahanap sa kanyang bag ay isang anting-anting na yari sa shell ng bala.
Ayon kay Dizon, maaaring kaso ito ng mistaken identity ngunit iginiit niyang hindi dapat hinaharang ang mga pasaherong nakalampas na sa boarding gate.
Pangulong Marcos naman ay nag-utos ng agarang imbestigasyon sa insidente upang matiyak na hindi na mauulit ang umano’y modus na ito.
Bilang tugon, sinabi ni Dizon na maglalagay siya ng hotline para sa mga reklamo ng pasahero upang matiyak ang mabilis na aksyon sa mga insidente sa airport.
Pinuri naman ni Sen. Grace Poe ang mabilis na aksyon ng DOTr, na aniya’y mahalaga upang maiwasang masira muli ang reputasyon ng NAIA sa mga turista at biyaherong Pilipino.