Sinimulan kahapon ng transport group na Manibela ang kanilang tatlong-araw na nationwide transport strike bilang protesta sa umano’y sobrang taas na multa, hindi pag-renew ng franchise, at umano’y “payola culture” sa DOTr at LTFRB.
Nagtipon ang mga kasapi sa iba’t ibang lugar sa Metro Manila gaya ng Philcoa sa Quezon City at Nagtahan sa Maynila, at itinigil ang pagpasada, na nagresulta sa paglalakad ng ilang commuters at paghahanap ng alternatibong masasakyan.
Ayon kay Mar Valbuena, presidente ng Manibela, isa sa pangunahing dahilan ng strike ang hindi natupad na pangako umano noong panahon ni dating DOTr Secretary Vince Dizon. Aniya, pinangakuan sila na maipaparehistro ang kanilang mga jeep para makapagpatuloy sa operasyon, ngunit hindi ito naisakatuparan. Dahil dito, nasayang umano ang gastos ng mga tsuper para sa pagkumpuni at inspeksyon ng kanilang mga sasakyan.
Libreng Sakay at Tugon ng Pamahalaan
Nag-deploy ang Philippine Coast Guard (PCG) ng mga sasakyan sa Metro Manila upang tulungan ang mga commuter bilang tugon sa direktiba ni Pangulong Marcos na tiyaking tuloy ang biyahe ng publiko sa gitna ng strike. May mga bus at truck ding naka-standby para sa mga posibleng ma-stranded.
Sa Malabon, nagpaikot ang lokal na pamahalaan ng siyam na sasakyan para sa libreng sakay, kabilang ang tow truck, L300 van, mga APV, troop carriers, at iba pa. Tiniyak ni Mayor Jeannie Sandoval na walang mananatiling stranded na pasahero.
Naglagay rin ng PNP personnel sa mga pangunahing lugar upang magpanatili ng kaayusan at tumulong sa mga commuter na apektado ng strike.