Mahigit 100 Chinese nationals na sangkot umano sa mga POGO scam ang na-deport kahapon, ayon sa Presidential Anti-Organized Crime Commission (PAOCC).
Sinabi ng PAOCC na sumakay ang mga deportee sa Philippine Airlines papuntang China mula sa Ninoy Aquino International Airport Terminal 1 ng alas-10:40 ng umaga.
Isinagawa ang deportasyon kasabay ng Bureau of Immigration at embahada ng China, matapos ang mga joint law enforcement operations na nagresulta sa pag-aresto sa mga dayuhang ito.
Nadakip ang mga Chinese nationals sa mga scam hubs sa iba’t ibang bahagi ng bansa tulad ng Lapu-Lapu City, Cebu noong Agosto 31, 2024; Silang, Cavite noong Enero 16; Parañaque noong Pebrero 20; at Pasay noong Pebrero 27.
Ayon sa PAOCC, bahagi ang deportasyon sa mas pinagtibay na kampanya ng gobyerno laban sa ilegal na online gaming at panlilinlang ng mga dayuhan.
Ito ay alinsunod sa utos ni Pangulong Marcos na wasakin ang mga organisadong kriminal at ipatupad ang nationwide ban sa offshore gaming operations.