Sampung kababaihan na pinaghihinalaang ibinubugaw kapalit ng P3,000 kada isa ang nasagip sa isang operasyon ng NBI-Region 1 noong Marso 5 sa San Fernando City, La Union.
Ayon kay NBI-1 Director Atty. Joel Tovera, dalawa sa mga biktima ang umamin na sila ay iniaalok ng kanilang handler na si Danica Aliocod, alyas “Tolits.”
Sa isang entrapment operation na isinagawa sa isang lodge sa Barangay San Vicente, tumanggap si “Tolits” ng bayad mula sa isang undercover agent na nagpanggap na customer. Ilang sandali pa, dumating ang sampung kababaihan na agad sinagip ng mga operatiba at social workers.
Ang mga biktima ay isinailalim sa pangangalaga ng DSWD para sa kanilang kaligtasan at rehabilitasyon.
Tiniyak ni Tovera na patuloy nilang paiigtingin ang kampanya kontra human trafficking upang masugpo ang ganitong krimen.