Nasabat ng mga awtoridad ang iligal na produktong marijuana na nagkakahalaga ng ₱480,400 sa isang warehouse sa Pasay noong Enero 16, ayon sa ulat.
Idineklarang accessories at candies ang parcel, ngunit nang siyasatin ay natuklasang naglalaman ito ng 0.32 kilo ng tuyong marijuana at walong vape cartridges ng cannabis oil.
Isinuko na sa Philippine Drug Enforcement Agency (PDEA) ang mga nakumpiskang item at ang claimant para sa tamang disposisyon at pagsasampa ng kaso.
Ayon kay Bureau of Customs (BOC) Commissioner Ariel Nepomuceno, patunay ang nasabing operasyon ng patuloy na pagbabantay ng ahensya laban sa pagpasok ng ilegal na droga sa pamamagitan ng postal at courier channels. Pinuri rin niya ang pagiging mapagmatyag ng mga tauhan ng Customs sa Ninoy Aquino International Airport.